20/04/2024
(162 utenti online)
Poesie Redazione 27 febbraio 2017 20:41 Circa 1 minuto per leggerlo stampa
’Na vota ire fasciste o comuniste,
oppure d’ ’a Democrazia Cristiana;
mò vide mille nomme ’e ciente liste,
ma ognuno ’e lloro è ’nu figlio ’e puttana:
s’accatta ’e vute pe’ ’nu muorzo ’e pane,
sfruttanno ’a famma d’ ’a povera gente;
ogge ciente prumesse e po’ dimane…
’e chello d’ajere nun s’arricorda niente.
Ma ’na vota ca lla ’ncoppa c’è arrivato.
se venne pe’ ’nu posto o ’na poltrona,
passanno ’a ’nu partito dint’a ’n’ato,
facenno ’a pulitica sporca e lazzarona.
E je penzo ca ’nu juorno aggio vutato
a uno ’e lloro ca dicenno jeva :
“Ti cambierò l’Italia”, ma ha cagnato
surtanto ’a posizione ca teneva.
Si tenesse surtanto ’o ppoco ’e scuorno
pe’ comme se comporta a ’o Parlamento,
e se guardasse ’nu poco ancora attorno,
se sputarrìa pe’ faccia a ’nu mumento.
S’appicceca e s’attacca cu ’e cumpagne,
facenno a vedé ca lotta comm’a cche,
ma ’nziem’a lloro doppo cu ’o champagne
ridono ’ncuoll’a te e ’ncuoll’a me.
’Na vota s’appresentava ’int’ ’o cumizio
guidato da nu nobbile ideale;
mò parla pe’ jì sulo a cchillu servizio
a nuje povere fesse e farce ’o mmale.
Vincenzo Cerasuolo
RIPRODUZIONE RISERVATA © Copyright MARIGLIANO.net
Commenti